Ф.1278. Оп.1. Д.5. л. 4. 1-кат

Кусеин!

Мен сенин катыңды алган күнү жоголгонум табылгандай болуп жооп жазууга шаштым. Ал катты жазганыма 3 күн болду. Ошондон берикөп убакыт өкөндөй болуп бул катты да жазууга ашыктым. Сенин катыңды алгандан бери башка жактан кат ала элекмин. Ошондуктан жаңылыктарды айта албаймын. Аз турмушумду сурасаң абдан жакшы. Дарылыкка деп ай сайын бир жарым, эки литрче арак берет. Аным аптекадан үзүлбөйт. Билбейм сен ал жагынан кандайсың? Мингеним ат, көңүл сүйгөн жакка зыр коюп жетип барам. Атты багып тазалап жем берүүчү кишим бар. Иши кылып еызматым оор эмес,жана жаман деп айтууга да болбойт. Жалгыз кана кемчилигим мурдакы-Фрунзедеги курбу-курдаштардын бирөө да жанымда жок! Фронтко келгениме бүгүн туура 1жыл 15 күң болду. Ошондон бери жазганым 3 кана ыр болду. Башында деле кыйратып жиберүүчү эмес элем го ошондой болсо да чоло тийип шарт түзүлсө арбытуучу кейиптенем. Жазган ырымдын түзүгүрөөк дегендеринен бирөөнү сага көчүрүп жиберейин, сынап кой! Салам! Аскасында аркар, кулжа жайлаган Адырында атыр жыт гүл жайнаган Ак кар баскан чокусунда булутту Арча жыттуу айдарым жел айдаган Бадалында балалуу элик бакырып Бактарында булбул сайраган Өзөнүндө өрдөк, казы каркылдайт Буткусунда булак оргуйт кайнаган Жайлоосунда жай күндөрдө туйлатып Кулан сындуу кулундарын байлаган Чапса күлүк басса жорго тулпары Ак сулуунун данын жара чайнаган Талаасында талыкпас эр эмгекчи Алтын дандан азык түлүк камдаган Кендеринде кең көөдөндүү жумушчу Тоо уратып таш кулатып чамдаган Ала-Тоолук атпай элдин тукуму Ата Мекен согуштан ук салам ххх Кече элим кетмен ломун батырып Ойдон, тоодон ортокторун чакырып Орто-Токой, Отуз-Адыр, Кең Чүйдүн Топурагын тозон кылып сапырып Ак чекедей абышкалар эмгекте Өз нормасын өлчөмүнөң ашырып Калың элим канал казып жатканда Кара жердин каткан сыры ачылып Кыштактагы кыргыз кызы мурдакы Шайырбүбү шаңдуу келин атыгып Аз калганда Ак-Туз басып жетүүгө Балбан поезд Балыкчыга бакырып Байыртадан баян болуп келаткан Манас тому Москвада басылып Май-Суу, Түргөн, Чаңгырташтын нефтиси Чыккан жаткан фонтан болуп атылып Арбак урган Атилланын тукуму Ары жолдо жолтоо болду катылып Каракчылар капысынан басам деп Касиетүү казынаны чачам деп Калк эмгеги кайнап жаткан кезекте Кагыш тийген кара тажаал бузду чек Как ошол күн калың элим чогулуп Каргыш кылды:”Касам урган кара бет”! Карышкырды канча багып күтсөң да Корооңду ага кайтартпагын деген кеп Кана балдар! Кан майданга! Казатка! Катарланып тизилгиле! Ким эркек! Карыялар колун жайып кобурап Кыргыз эли кылым бою жоого бек Кытайлардын кырк миң колун кыйраткан Кыран баатыр Чубак, Сыргак, Эр Серек! Кошой, Манас колдон алып сүрөсүн! Кубат берсин куралыңа Курманбек! Кылыч тагып мылтык асып узатты Уландарын узак жолго камын жет ххх Айткан акыл азатыңа арзыган Азаматтар ат боорунан кечти кан Тагдыр үчүн таалай үчүн күрөштө Арабыздан чыкты далай шер арстан Ким аяса ошол касы Мекендин Чымын жанын баса келген душмандан Калкым сенин батаң ошо болгон соң Баатырларды багынтмакпы бул майдан Аксак кадам артка жылып чегинбей Мекен үчүн нечен баатыр кыйды жан Дүйшөнкулдай, Чолпонбайдай шерлерди Ким унутмак, ким окубайт тарыхтан Булар үлгү, булар күзгү биз үчүң Кыргыз элин бүт дүйнөгө тааныткан Абдыбеков ал эрлердин күнүн кууп Мына бүгүн туура үч жүз Ганс аткан Жазбас чебер жазайынчы кулунуң Сагынбаев замбрекчи танк аткан Ал жигиттин ат башындай огунан Далай фриц ал дүйнөдөн жай тапкан Бүгүн кызыл кыраандарың чабуулда Эркин элим кууна, жырга, күл шаттан Жыйырманчы кылымдагы кыргындан Жамакчы элим жаза көргүн бир дастан Комуздарын сайратышсын күү чалып Карамолдо, Атай, Ыбрай, Уста-Актан Жигиттериң жеңип кайтмак душманды Жергелүү элим кам санаба биз жактан Балбандарың балтыргандай керткилейт Бандиттерди Бак багына башпаккан Канкор Гитлер өз башына сынады Кандай экен казынага өрт жаккан 10.01.43 жыл. 1.Абдыбеков К.Ф.дагы снайпер 2.Сагынбаев К.Ф.дагы артиллерист